ENGLISH/INUKTITUT
traditionandtransition@mun.ca        


Unikkausivut



Ilinnianik UKausimmik, Imminik Kaujimannik

Pigatsagijaujut

PiusituKait amma Asianottauvalliajut tallimanik jârinut ikajuttigenniuvuk akungani Nunatsiavut kavamakkunut, tainna namminik-aulatsivuk timiKutiuvuk kiggatujuk taikkuninga Inuit taggami Labradorimi, amma Memorial Ilinniavitsuanganik Newfoundland-imi. Tânna tugâgutigiluattanga ikajuttigennimik unauvuk sangilittisivalliagiamut tamâgennik piusituKait Inuit Kaujimausinginnik amma Kaujisattaujunut Nunatsiavummi kamagennagasuagiamut kajusiutigijaukKulugit pimmagittojumut Labrador Inuit ilikkusigijanga.

Tânna ikajuttigennik sanajaumajuk atjigettumik ikajuttigennimik taikkununga maggonut katutjiKatigengujunut amma sakKititsigasuajuk tukiKatsiatumik tautseKatigennimik Kaujimajaujunut, iniutluni ilisimallagijut KaujigumaKattajanginnik amma inosimajunut atuttauKattasimajunut amma Kaujimajaujunut taikkunangat Labrador Inuit pijagegiamut Labrador Inuit pigumajanginnik kamagiamut ullumiulittuk amma sivunittini atuttaugiaKajunut Nunatsiavummi.

2015 nalunaitsilauttuk senanik jârinik ullusiugutinganik Nunatsiavut namminik aulatsiliaKilaunninnginnik, taipsumani ullusiugatsaulilaummat, namminik takunnâgiamut, amma pivitsaKatlutik takuniagiamut sivunitsanganut Nunatsiavummut inoKatigengutlutik. Kaujisattet Memorial-imit amma asingit ilinniavitsuat ikajuttigesimalittut taikkununga Labrador Inugijanginnut taimangasuanit Kanuittusuatuinnanik suliatsaKatlutik. PiusituKait amma Asianottauvalliajut kajusiutigijautuinnalungituk suliagijanginnik, tâvatuak asianguvalliasimajuk, Kaujisattet kingullianut allunialimmata sakKititsigiamut tukiKatsiatumik ilagenimmik piunitsamik tukisigasuagiamut Labrador Inuit kinakkoninginnik. Tânna Kaujisannik tâpsumangat ikajuttigennimit suli amma kajusiutigijaulangavuk sakKititsigiamut anginitsamik puttujumik tukisiKatigennimik, tâvatuak ikajuniammijuk Labrador Inuninginnik sangilititsivallianikkut namminik nunaKakKâsimajuit namminik aulatsinimmik.

Kaujisagaluappatalonnet ‘taimangasuanit piusituKausimajunut’ Nunatsiavuttet itsasuanittavininnut atugajattanginnut, upvalu sanallutik Inuttitut suguset atuagatsanginnik, tânna tugâgutigijanga taikkununga PiusituKait amma Asianottauvalliajunut unauvut sanagiamut akuni ataKatigennimik akungani kingunitsanut Inunnut amma puttujumik ilinniajunut suliaKajunullu Nunatsiavummi. InutuKait, inosuttut, angijutlet Kaujisattet, amma pijagesimajut illiajanginnik ilonnatik suliaKaKatigeKattajut atâgut taimâtsainak tugâgutiKatlutik, piunitsamik tukisigiamut amma ikajugiamut sangilivalliagiamut Labrador Inuit ilikkusinginnik, kinakkoninginnik, amma sivukkatiginikkut.